ТҮРКІСТАН ОБЛЫСЫНДА ЖЫЛ ҮЗДІКТЕРІ МАРАПАТТАЛДЫ

Бүгін Түркістан қаласында 2018 жылды қортындылаған салтанатты іс-шара өтті. Жиында Түркістан облысының әкімі Жансейіт Түймебаев жұртшылықты Жаңа жыл мерекесімен құттықтап, өңірімізде еңбегімен дараланған әр түрлі сала қызметкерлерін марапаттады.

«ХХІ ғасырдың белсенді азаматтары бәсекеге қабілетті болуы тиіс. Қазіргі кезеңде елге қызмет етіп отырған азаматтар шығармашылыққа бейім, еркін ойлы, креативті әрі зиялы болғаны жөн. Аталған ізгі қасиеттер барлық сала қызметкерлерінің бойынан табылуы қажет. Бұл — бүгінгі заманның талабы. Бүгін талай сындардан сүрінбей өткен нағыз дүлдүлдер ортамызға келіп отыр. Осынау жетістіктеріңізбен шын жүректен құттықтаймын! Алдағы уақытта да мемлекет пен қоғам мүддесі жолында талмай еңбек етіп, белсенді азаматтық ұстаныммен ортақ мақсатты жүзеге асыруға үлес қосатындықтарыңызға сенімдімін. Түркістанға қызмет ету — абыройлы міндет. Бүгінгі марапаттарыңыз сіздерге шабыт беріп, жаңа шыңдарға жетелейді деп ойлаймын», — деген облыс әкімі жылдың үздігі атанған азаматтарды марапаттады.

Салтанатты іс-шарада жылдың үздік 15 мекемесі мен кәсіпорнына марапат тапсырылды. Олардың арасында «Үздік медицина мекемесі» болып Түркістан облысы денсаулық сақтау басқармасына қарасты «Облыстық клиникалық ауруханасы» атанды. Мәртебелі марапатты Түркістан облысының әкімі Жансейіт Түймебаев аурухананың
бас дәрігері Марат Пашимовқа табыс етті.

Сонымен бірге,  кәсіпкерлік, туризм, экономика, қаржы, руханият және мәдениет, денсаулық сақтау, спорт, құрылыс, білім, ауыл шаруашылығы, мұрағат, тұрғын үй – коммуналдық шаруашылық, энергетика және өзге де салалар бойынша 40 адам марапатталды.

«Жылдың үздік баспасөз хатшысы» атағына Түркістан облысы денсаулық сақтау басқармасының баспасөз хатшысы Мира Сүлейменова ие болды.

«Жылдың үздік дәрігері» болып Отырар ауданы орталық ауруханасының дәрігері Гаухар Дүйсебаева атанды.

«Жылдың үздік санитарлық дәрігері» атағына Облыстық тері – венерология диспансерінің дәрігері Екатерина Комарова ие болды.

«Жылдың үздік мейірбекесі» болып Облыстық клиникалық ауруханасының мейірбикесі Әуескүл Сүйеубекова атанды.

Жылдың үздік спортшысы атағына Дидар Хамза ие болса, Әдіхан Полатбеков жылдың үздік құрылысшысы деп танылған. Жыл агрономы болып Болатбек Құметов танылса (Шардара ауданы), Мұқағали Кенжетайұлы жыл ақыны атанды. Байқап отырғандарыңыздай, марапатталғандардың арасында қарапайым жұмысшыдан бастап білікті басшылар да бар.
Жылдың ең үздік қызметкерлері марапатталған жиында облыстың өнер ұжымдары өнер көрсетіп, концерттік бағдарламасын ұсынды.